नाशिक | सोशल मीडियावर वाढलेली ओळख एका महिलेला चांगलीच महागात पडली आहे. फेसबुकवर झालेल्या मैत्रीचा गैरफायदा घेत एका सायबर गुन्हेगाराने तब्बल 16 लाख 35 हजार रुपयांची फसवणूक केल्याची घटना उघडकीस आली आहे.
जेलरोड परिसरातील 35 वर्षीय महिलेने या प्रकरणी सायबर पोलीस ठाण्यात तक्रार दाखल केली आहे. मिळालेल्या माहितीनुसार, मे महिन्यात तिला एका अनोळखी व्यक्तीकडून फ्रेंड रिक्वेस्ट आली. काही दिवस गप्पा झाल्यानंतर आरोपीने तिचा विश्वास संपादन केला.
यानंतर विविध कारणे सांगून पैशांची मागणी सुरू झाली. कधी अपघात झाल्याचे सांगून मदत मागितली तर कधी मुलीच्या प्रवेश व वसतिगृह फीच्या नावाखाली पैसे मागण्यात आले. विश्वासात घेतलेल्या महिलेने विविध खात्यांमध्ये आणि ऑनलाइन वॉलेटमधून पैसे पाठवले.
काही महिन्यांतच तिच्याकडून तब्बल 16 लाख 35 हजार रुपये उकळण्यात आले. अखेरीस संशयिताने संपर्क तोडला आणि महिलेला आपली फसवणूक झाल्याचे लक्षात आले. यानंतर तिने सायबर पोलिसांकडे धाव घेतली.
या प्रकरणी गुन्हा दाखल करण्यात आला असून पुढील तपास सुरू आहे.
